Aprila renkontiĝo

Mardon la 17an de aprilo, Esperanto-parolantoj kunvenis en Kardifo, kiel ĉiumonate, babiladi, trinki, kune manĝi… Ĉi-foje nia kunveno estis tre internacia.  Estis kun ni niaj geamikoj de Esperanto-Asocio de Irlando, Girvan kaj Maire McKay, kiuj estis vizitante Kardifon laŭvoje al la Brita/Skota Kongreso en Edinburgo.

Ankaŭ alvenis Veronika el Hungario kaj Gérald el Francio kaj kutimaj ĉeestantoj el Bath, Bristolo, Kardifo, Swansea [sŭonzi], Pontardawe [pontardaŭe], Tonypandy [tonepandi], ktp.

Entute ni estis 12 homoj kaj pasigis tre interesan vesperon kune. Kiel ĉiam la konversacio estis diverstema, sprita kaj verva. Girvan tre afable donacis al nia grupo kopion de lia verkaĵo William Auld – Esperanto Poet kiu estas traduko de La Infana Raso de William Auld en la anglan, la skotan kaj la gaelan. Girvan afable deklamis por ni elĉerpaĵo el la verkaĵo en la angla, la skota kaj la gaela, kiu estis tre interesa.

Tute ne eblus resumi la tutan vesperon ĉi tie. Do, venu venontan fojon kaj mem spertu!  Intertempe jen kelkaj fotoj:

 

Krespoj kaj konversacio en Kardifo

Mardon la 21an de februaro, ni kunvenis ĉe nia kutima trinkejo por la februara konversacia renkontiĝo.  Ĉi-foje ni estis malgranda grupo, sed ĝuis tre agrablan vesperon kune.

krespetoj similaj al tiuj kiujn ni manĝis

Ĉar estis ‘grasa mardo’, ankaŭ nomita ‘krespa tago’ kelkaj el ni manĝis krespojn. Fakte ne estis la tipaj tradiciaj britaj krespoj, temis pri malgrandaj kaj pli dikaj krespetoj kiel oni ofte manĝas en Usono. Ili ne estis perfektaj, sed kovrita per ĉokolada aŭ frukta saŭco, estis tute manĝeblaj.

Nia babilado, kiel kutime, traktis multajn diversajn temojn. Ni diskutis mondan kaj lokan politikon, vojaĝadon, legadon kaj ŝatokupojn. Ni tostis du lastatempe forpasintajn konatulojn – Dick Phillips kiu estis instiganto de la nova grupo ĉe Bath kaj mian onklon Charles Eason kiu kvankam ne Esperantisto, estis dumviva subtenanto de la Kardifa grupo.

Kiel kutime ni klopodis plibonigi nian lingvan scipovon kaj inter la vortoj kiuj ne lernis aŭ relernis troviĝis ‘kurkumo‘ kaj ‘safrano‘ (tre ofte ni diskutas manĝaĵon )  Ni ankaŭ diskutis esperantigon de la landa nomo ‘Gronlando’, ‘Grenlando’ aŭ ‘Groenlando’.

Do, estis agrabla kaj interesa renkontiĝo kaj ni ĉiuj antaŭatendas la venontan grupan kunvenon kiu okazos je mardo la 20a de marto.  Ĝis tiam!

 

Virtuala kunveno januaro 2012

Mardon la 17an de januaro, membroj de Esperanto en Kardifo kunvenos ĉe la kutima urbocentra trinkejo (Prince of Wales) por la unua renkontiĝo de 2012.

Sed eble vi ne troviĝas en aŭ apud Kardifo? Ne ploru ke ve ne povos esti kun ni ĉar nun, virtuale, eblas ‘veni’ al nia kunveno! Jes, denove la 17an de januaro, Esperanto en Kardifo okazigos Guglan ‘hangout’ per Google Plus, samtempe kun nia kunveno.

Do, inter 18.30 kaj (proks.) 21.30 UTC venontan mardon, aliru la reton kaj venu diri saluton al ni. Jes, jes, mi scias – pro la horzono la horo ne taŭgos al ĉiuj (kvankam apenaŭ kredeblas ke vi ne emos ellitiĝi meznokte por babiladi kun ni). Sed se eblas, venu!

Kiel partopreni:

1. Se vi ankoraŭ ne membriĝis en Google Plus – tuj faru! (Se vi jam havas Guglan retadreson, facilas).

2. Serĉu min (Heather Eason) kaj petu ke mi aldonu vin al mia ‘cirklo’.

3. Avide atendu mardon, je la ĝusta horo ensalutu, kaj sekvu la ligon al la ‘hangout’ renkontiĝo.

Okaze de demando, klaku ĉi tie por kontakti nin.

Ni ne promesas ke perfekte funkcios – ni ankoraŭ provas diversajn rimedojn por virtualigi niajn kunvenojn – sed ni esperas ke almenaŭ donos al ni (aparte al niaj komencantoj) la oportunon renkonti interesajn homojn tutmonde.

 

Zamenhofa Tago 2011

La 15an de decembro 2011, iuj el la membroj de Esperanto en Kardifo renkontiĝis por festa manĝaĵo.  Baldaŭ estos la Kristnaskaj kaj Jarfinaj festoj. Ankaŭ, kompreneble, je la 15a de decembro, Esperanto-parolantoj memoras Zamenhofan Tagon (ankaŭ nomita Tago de Esperanto-Literaturo).  Tial ni taksis bone kune iri al restoracio kie ni ofte manĝas kaj multe festi. La restoracio, Vegetarian Food Studio, en Kardifo, kuiras bongustegan vegetaran hindan manĝaĵon. 

Ĉeestis 11 Esperanto-parolantoj kaj unu ‘krokodilo’.  Sed ĉar la ‘krokodilo’ kunportis la varmigitan spicitan vinon, ni permesis al li resti Ni ĉiuj pasigis tre ĝueblan vesperon kaj ŝatus doni al vi la oportunon ankaŭ ‘partopreneti’ kun ni:
 

 

Virtuala kunveno

Kie ajn vi estas en la mondo, venu morgaŭ (22a de novembro) al kunveno de Esperanto en Kardifo! Jes, kondiĉe ke teknikaj aspektoj funkcios, morgaŭ ni okazigos Guglon ‘hangout’ samtempe kun nia kunveno. Verŝajne tio okazos proksimume inter la 19a kaj 21a vespere UTC.

Estas 9 ‘liberaj lokoj’ por iuj kiuj ŝatus ‘partopreni’. Venu saluti nin dun 5 minutoj aŭ ĉeestu la tutan kunvenon se vi aŭdacas

Nia grupo inkluzivas komencantojn, progresantojn, fluajn parolantojn… Do ne timu veni, eĉ se vi nur volas aŭskulti.

Se vi ŝatus esti invitata al la ‘Hangout’ mesaĝu al ni!

 

oktobraj novaĵoj

La oktobra kunveno de Esperanto en Kardifo okazis hieraŭ ĉe nia kutima trinkejo en la urbocentro.

Mankis kelkaj kutimaj ĉeestantoj (pro laboro, studado, grimpado de Maĉupikĉuo ktp) sed ni bonvenigis novan lernanton kiu estis kuraĝe vojaĝinte de Pontardawe [pontardaŭe] en la fora kaj sovaĝa okcidento… (ne, ne, mi nur ŝercas – nu, almenaŭ mi iom ŝercas!)

Nia konversacio estis, kiel ĉiam, diversa kaj interesa.  Derek ĵaluzigis nin parolante pri lia venonta vizito al Meza Ameriko; kelkaj el ni grumbladis pri laboraj fiaskoj; ni plendadis pri la malbona provizo da biciklo-vojoj en Kardifo kaj maltoleremaj aŭto-veturantoj.

Meze de la vespero, Rob ekeltrovis ke haveblis nova gast-biero – citrona biero kiu nomiĝis ‘taking the pith’ (vortludo en la angla). Kompreneble  ni taksis bone elprovi tion kaj ja estis sufiĉe bongusta kun natura, ne tro artefarita, gusto.

Kvankam ni diskutas multajn diversajn temojn, ni ne neglektas lingvistikaĵojn. Longe ni pridiskutis taŭgan vorton por ‘spirits’ (jes, alkoholaĵoj, ĉu vi ne jam konas nin?) por kiu la kutima vorto estas ‘brando’. Posta serĉado ĉe Vikipedio montris ke estas multaj nomoj por diversaj brandaj alkoholaĵoj.

Ni decidis ŝanĝi la daton de nia novembra kunveno, kiu nun okazos je la 22a de novembro. En decembro ni renkontiĝos je la 15a de la monato – tradicie tio estas la Zamenhofa Tago, do ni iom festos ĉe nia ŝatata restoracio Vegetarian Food Studio. La menuo tie estas vasta kaj bongusta. Aparte plaĉas al ni la t.n. ‘atombomboj’ – tre spicaj manĝaĵoj. Sed por tiuj kiuj preferas pli malspicaĵoj, estas ankaŭ bonaj elektoj – menuo troviĝas ĉi tie.

Iuj kiuj estos en aŭ apud Kardifo je tiuj datoj, nepre venu kunveni kun ni!

 

septembro

Mardon 20an de septembro, Esperanto-parolantoj renkontiĝis por la septembra kunveno de Esperanto en Kardifo.  Ĉeestis 7 personoj kaj, kiel ofte, ni renkontiĝis ĉe la trinkejo Prince of Wales en la urbocentro de Kardifo.  Estas kelkaj avantaĝoj de tiu trinkejo – proksimas al la stacidomo kaj al bushaltejoj por tiuj kiuj venas per trajno/buso; estas malmulte kostaj aŭtoparkejoj en la urbocentro vespere por tiuj kiuj venas per aŭto; eblas manĝi tie por tiuj kiuj venas rekte al la kunveno post la laboro; maltrokostas la trinkaĵoj…

Do, ni estis sep, ĉi-foje kaj ni venis de Kardifo, Swansea [sŭonzi], Risca [riska] kaj Bath. Ni diskutis multajn diversajn temojn kaj aŭdis pri someraj vojaĝoj faritaj de la ĉeestantaro al Meksiko, Usono, Japanio, Hispanio, Ukrainio (por la IJK) kaj la nord Kimraj montoj.

Ĉi-sube foto farita de nia preskaŭ oficiala fotisto Anĉjo.  Ĉeestintoj rimarkos ke mi tranĉis min el la foto Tion mi faris ĉar mi aspektis tiom ebria (kvankam mi ne estis, nur laca) ke mi ne volis montri min.  Se oni estas tiu kiu ĝisdatigas la blogon, oni havas tian kontrolon

Esperanto en Kardifo - 20a de septembro 2011

Nia venonta renkontiĝo estos je la 18a de oktobro.  Vidu la hejmpaĝon por detaloj.

 

Somera renkontiĝo

Mardon la 23an de aŭgusto renkontiĝis Esperanto-parolantoj ĉe nia ‘kutima’ trinkejo The Prince of Wales en la urbocentro de Kardifo. Kelkaj regulaj ĉeestantoj mankis al ni – ankoraŭ estas feria tempo por iuj el la gestudentoj kaj kelkaj kutimuloj forestis pro laboro ktp.

Do, kunvenis 7 parolantoj kaj ni ĝuis la vesperon babilante pri diversaj temoj (vojaĝado, lingvo-lernado, psikologio, biero, kaj tiel plu).

Se vi ankoraŭ ne ĉeestis nian grupon, la datoj por aŭtunoj kunvenoj nun haveblas ĉe la hejmpaĝo.

Esperanto en Kardifo kunvenis je la 23a de aŭgusto

 

maja renkontiĝo

Kiel kutime, kiam Esperanto-parolantoj renkontiĝis je mardo la 17a de majo por babilado, la konversacio estis tre diversa.

Inter aliaj temoj ni parolis pri vojaĝado (kun rakontoj pri Japanio, Hindio, Meksiko, la Galapagoj), lingvaj temoj (plaĉi/ŝati, je, lingvo-ŝanĝiĝo en Esperanto), scienco (logikeco, fiziko) kaj politiko (nova kimra registaro, senpaga aŭtobusvojaĝado).

Esperanto-parolantoj kunvenas en Kardifo

Mankis kelkaj el niaj kutimaj ĉeestantoj pro diversaj kialoj, sed estis plezuro bonvenigi novajn Eo-parolantojn kiuj estis kuraĝe vojaĝintaj de la angla urbo Bath.

Dum junio ne okazos renkontiĝo – multaj ĉeestontoj forestos – sed ni kunvenos sabaton la 9an de julio kaj kune vizitos la manĝaĵan festivalon ĉe la golfeto de Kardifo.

Kompreneble, ni ankaŭ bone manĝis kaj eĉ denove trinkis mangan bieron.

 

Ĉe Bristolo

Hieraŭ la suno bele brilis kiam membroj de Esperanto en Kardifo transiris la limon inter Anglio kaj Kimrio kaj ekskursis al la urbo Bristolo.

Nia renkontiĝa loko estis la trinkejo/restoracio Zero Degrees kie ni provis mangan bieron kaj bone tagmanĝis.

De la balkono ĉe la trinkejo Zero Degrees

 

Dum jardekoj ĉiam ekzistis forta ligoj inter Esperanto-parolantoj en suda Kimrio kaj en Sud-okcidenta Anglio, ĉar facile eblas vojaĝi inter la du regionoj. Ĉe la hieraŭa renkontiĝo estis enloĝantoj de la urboj Cardiff, Newport, Bristol kaj Bath.

Estas multaj interesaj konstruaĵoj en la urbo, ofte farbitaj per diversaj koloroj.

Post la tagmanĝo, ni promenadis tra Bristolo kaj, kompreneble faris fotojn. Interesa almozulejo:

Eblas promenadi laŭ la kajoj ĉe la haveno:

Ni vidis anason kun anasidoj:

La Brita politikisto Samuel Plimsoll naskiĝis en Bristolo. Li estas batalanto por pli bonaj kondiĉoj por maristoj kaj kreis la linion Plimsoll.

La ŝipo S S Great Britain [Vaporŝipo Granda Britio].  

La preĝejo St Mary Redcliffe [sankta maria ĉe Redclif] estas unu el la plej imponaj preĝejoj (ne katedralo) en Britio:

Do, estis tre ĝuebla kaj agrabla tago kaj ni esperas denove havi oportunojn kune ekskursi dum la somero.