Sed eble vi ne troviĝas en aŭ apud Kardifo? Ne ploru ke ve ne povos esti kun ni ĉar nun, virtuale, eblas ‘veni’ al nia kunveno! Jes, denove la 17an de januaro, Esperanto en Kardifo okazigos Guglan ‘hangout’ per Google Plus, samtempe kun nia kunveno.

Do, inter 18.30 kaj (proks.) 21.30 UTC venontan mardon, aliru la reton kaj venu diri saluton al ni. Jes, jes, mi scias – pro la horzono la horo ne taŭgos al ĉiuj (kvankam apenaŭ kredeblas ke vi ne emos ellitiĝi meznokte por babiladi kun ni). Sed se eblas, venu!

Kiel partopreni:

1. Se vi ankoraŭ ne membriĝis en Google Plus – tuj faru! (Se vi jam havas Guglan retadreson, facilas).

2. Serĉu min (Heather Eason) kaj petu ke mi aldonu vin al mia ‘cirklo’.

3. Avide atendu mardon, je la ĝusta horo ensalutu, kaj sekvu la ligon al la ‘hangout’ renkontiĝo.

Okaze de demando, klaku ĉi tie por kontakti nin.

Ni ne promesas ke perfekte funkcios – ni ankoraŭ provas diversajn rimedojn por virtualigi niajn kunvenojn – sed ni esperas ke almenaŭ donos al ni (aparte al niaj komencantoj) la oportunon renkonti interesajn homojn tutmonde.

Ĉeestis 11 Esperanto-parolantoj kaj unu ‘krokodilo’.  Sed ĉar la ‘krokodilo’ kunportis la varmigitan spicitan vinon, ni permesis al li resti Ni ĉiuj pasigis tre ĝueblan vesperon kaj ŝatus doni al vi la oportunon ankaŭ ‘partopreneti’ kun ni:
 

Estas 9 ‘liberaj lokoj’ por iuj kiuj ŝatus ‘partopreni’. Venu saluti nin dun 5 minutoj aŭ ĉeestu la tutan kunvenon se vi aŭdacas

Nia grupo inkluzivas komencantojn, progresantojn, fluajn parolantojn… Do ne timu veni, eĉ se vi nur volas aŭskulti.

Se vi ŝatus esti invitata al la ‘Hangout’ mesaĝu al ni!

Mankis kelkaj kutimaj ĉeestantoj (pro laboro, studado, grimpado de Maĉupikĉuo ktp) sed ni bonvenigis novan lernanton kiu estis kuraĝe vojaĝinte de Pontardawe [pontardaŭe] en la fora kaj sovaĝa okcidento… (ne, ne, mi nur ŝercas – nu, almenaŭ mi iom ŝercas!)

Nia konversacio estis, kiel ĉiam, diversa kaj interesa.  Derek ĵaluzigis nin parolante pri lia venonta vizito al Meza Ameriko; kelkaj el ni grumbladis pri laboraj fiaskoj; ni plendadis pri la malbona provizo da biciklo-vojoj en Kardifo kaj maltoleremaj aŭto-veturantoj.

Meze de la vespero, Rob ekeltrovis ke haveblis nova gast-biero – citrona biero kiu nomiĝis ‘taking the pith’ (vortludo en la angla). Kompreneble  ni taksis bone elprovi tion kaj ja estis sufiĉe bongusta kun natura, ne tro artefarita, gusto.

Kvankam ni diskutas multajn diversajn temojn, ni ne neglektas lingvistikaĵojn. Longe ni pridiskutis taŭgan vorton por ‘spirits’ (jes, alkoholaĵoj, ĉu vi ne jam konas nin?) por kiu la kutima vorto estas ‘brando’. Posta serĉado ĉe Vikipedio montris ke estas multaj nomoj por diversaj brandaj alkoholaĵoj.

Ni decidis ŝanĝi la daton de nia novembra kunveno, kiu nun okazos je la 22a de novembro. En decembro ni renkontiĝos je la 15a de la monato – tradicie tio estas la Zamenhofa Tago, do ni iom festos ĉe nia ŝatata restoracio Vegetarian Food Studio. La menuo tie estas vasta kaj bongusta. Aparte plaĉas al ni la t.n. ‘atombomboj’ – tre spicaj manĝaĵoj. Sed por tiuj kiuj preferas pli malspicaĵoj, estas ankaŭ bonaj elektoj – menuo troviĝas ĉi tie.

Iuj kiuj estos en aŭ apud Kardifo je tiuj datoj, nepre venu kunveni kun ni!

Do, ni estis sep, ĉi-foje kaj ni venis de Kardifo, Swansea [sŭonzi], Risca [riska] kaj Bath. Ni diskutis multajn diversajn temojn kaj aŭdis pri someraj vojaĝoj faritaj de la ĉeestantaro al Meksiko, Usono, Japanio, Hispanio, Ukrainio (por la IJK) kaj la nord Kimraj montoj.

Ĉi-sube foto farita de nia preskaŭ oficiala fotisto Anĉjo.  Ĉeestintoj rimarkos ke mi tranĉis min el la foto Tion mi faris ĉar mi aspektis tiom ebria (kvankam mi ne estis, nur laca) ke mi ne volis montri min.  Se oni estas tiu kiu ĝisdatigas la blogon, oni havas tian kontrolon

Esperanto en Kardifo - 20a de septembro 2011

Nia venonta renkontiĝo estos je la 18a de oktobro.  Vidu la hejmpaĝon por detaloj.

Do, kunvenis 7 parolantoj kaj ni ĝuis la vesperon babilante pri diversaj temoj (vojaĝado, lingvo-lernado, psikologio, biero, kaj tiel plu).

Se vi ankoraŭ ne ĉeestis nian grupon, la datoj por aŭtunoj kunvenoj nun haveblas ĉe la hejmpaĝo.

Esperanto en Kardifo kunvenis je la 23a de aŭgusto

Inter aliaj temoj ni parolis pri vojaĝado (kun rakontoj pri Japanio, Hindio, Meksiko, la Galapagoj), lingvaj temoj (plaĉi/ŝati, je, lingvo-ŝanĝiĝo en Esperanto), scienco (logikeco, fiziko) kaj politiko (nova kimra registaro, senpaga aŭtobusvojaĝado).

Esperanto-parolantoj kunvenas en Kardifo

Mankis kelkaj el niaj kutimaj ĉeestantoj pro diversaj kialoj, sed estis plezuro bonvenigi novajn Eo-parolantojn kiuj estis kuraĝe vojaĝintaj de la angla urbo Bath.

Dum junio ne okazos renkontiĝo – multaj ĉeestontoj forestos – sed ni kunvenos sabaton la 9an de julio kaj kune vizitos la manĝaĵan festivalon ĉe la golfeto de Kardifo.

Kompreneble, ni ankaŭ bone manĝis kaj eĉ denove trinkis mangan bieron.

Nia renkontiĝa loko estis la trinkejo/restoracio Zero Degrees kie ni provis mangan bieron kaj bone tagmanĝis.

De la balkono ĉe la trinkejo Zero Degrees

Dum jardekoj ĉiam ekzistis forta ligoj inter Esperanto-parolantoj en suda Kimrio kaj en Sud-okcidenta Anglio, ĉar facile eblas vojaĝi inter la du regionoj. Ĉe la hieraŭa renkontiĝo estis enloĝantoj de la urboj Cardiff, Newport, Bristol kaj Bath.

Estas multaj interesaj konstruaĵoj en la urbo, ofte farbitaj per diversaj koloroj.

Post la tagmanĝo, ni promenadis tra Bristolo kaj, kompreneble faris fotojn. Interesa almozulejo:

Eblas promenadi laŭ la kajoj ĉe la haveno:

Ni vidis anason kun anasidoj:

La Brita politikisto Samuel Plimsoll naskiĝis en Bristolo. Li estas batalanto por pli bonaj kondiĉoj por maristoj kaj kreis la linion Plimsoll.

La ŝipo S S Great Britain [Vaporŝipo Granda Britio].  

La preĝejo St Mary Redcliffe [sankta maria ĉe Redclif] estas unu el la plej imponaj preĝejoj (ne katedralo) en Britio:

Do, estis tre ĝuebla kaj agrabla tago kaj ni esperas denove havi oportunojn kune ekskursi dum la somero.

Ni daŭrigos tiujn tradiciajn ligojn per vizito al Bristolo la 16an de aprilo 2011.

Ni planas renkontiĝi ĉe la trinkejo/restoracio Zero Degrees Bristol je proks. la 1-a posttagmeze. Ni kune manĝos, trinkos, babilados, diskutos kaj poste iom esploros la urbon (laŭvole kaj laŭvetere).

Tiuj kiuj vojaĝos de Kardifo, trafos la trajnon kiu forlasos Kardifon je 11.30, Novporton (Newport) je 11.44 kaj atingos Bristolon je 12.19.

Por pli da detaloj klaku ĉi tie por kontakti nin.

Ni ankaŭ pridiskutis niajn venontajn kunsidojn:

Mardo 8 marto – ni renkontiĝos ĉirkaŭ la 7a vespere ĉe la trinkejo Prince of Wales kaj poste iros kune al Vegetarian Food Studio por manĝi. Por tiuj kiuj ne antaŭe manĝis tie – temas pri hinda vegetarana manĝaĵo – menuo kaj aliaj detaloj troviĝas ĉe: http://www.vegetarianfoodstudio.co.uk/
 
Sabato 16 aprilo – renkontiĝo en Bristolo.  Ni planas alveni en Bristolon ĉirkaŭ tagmeze. Pli da detaloj haveblos baldaŭ, sed se vi havas ideojn por la posttagmezo, bv. diru!
 
Majo -  renkontiĝon la vespero de la 17a de majo (mardo) – ĉu taŭga? La sugesto estas ke ni iru al Zero Degrees en Kardifo (http://www.zerodegrees.co.uk/location-cardiff.html).  Tiuj en la grupo kiuj interesiĝas pri biertrinkado povos provi la diversajn bierojn tie.  Kompreneble estas multaj aliaj trinkaĵoj alkoholaj kaj nealkoholaj. Ankaŭ eblas manĝi/manĝeti (por tiuj kiuj venos rekte de la laborejo).
 
Aliaj planoj – ni hieraŭ pridiskutis aliajn planojn por la jaro. Iam dum la somero ni provos viziti la muzeon ĉe St Fagans sabaton aŭ dimanĉon kaj verŝajne ankaŭ la festivalo de Cardiff Bay (datoj ankoraŭ ne haveblas.  Dum novembro okazos la Kardifa Bierfestivalo, kaj almenaŭ kelkaj verŝajne ekskursetos tien – datoj ankoraŭ ne haveblas).

Do, ĝis la venonta!